Event the event в
Дэманстрацыя твораў паказвае разнастайнасць інтарэсаў аўтара як мастака, мастацтвазнаўцы і арганізатара музейнай справы Беларусі. У экспазіцыі прадстаўлены 30 работ аўтара. Творчасць мастака характарызуецца арыгінальным пазнавальным стылем, глыбокім філасофскім зместам, сцвярджэннем вечных духоўных каштоўнасцей, зваротам да сваіх каранёў, любоўю да сваёй зямлі і сваіх бацькоў. Карціны ўяўляюць сабой сплаў суб’ектыўна-лірычнага і рацыянальна-прагматычнага пачаткаў, што дае магчымасць раскрыць і паказаць на палатне парыў сваіх пачуццяў і думак праз гарманічную завершанасць, кампазіцыйную, пластычную і колеравую арганізацыю твора. Сярод прадстаўленых палотнаў, пачынаючы з 80-х гадоў ХХ стагоддзя, – карціны розных жанраў: пейзажы, нацюрморты, партрэты, эпічныя палотны.
Упершыню будуць прадстаўлены тры новыя творы: “Провады ветэрана. Памяці бацькі”, “Суладдзе зямного і нябеснага. Памяці Веры” і “Дарога дадому”. 2 жніўня 2025 года спаўняецца 100 гадоў з дня нараджэння Івана Пятровіча Пракапцова, удзельніка Вялікай Айчыннай вайны, бацькі мастака. Уладзімір Іванавіч спецыяльна напісаў твор “Провады ветэрана”. Мастак успамінае, як 16 верасня 2003 года праводзілі ў апошні шлях бацьку, у роднай хаце гарэлі свечкі, родныя і суседзі прыходзілі на развітанне… Аўтар паказвае ціхі начны вясковы пейзаж, родную хату з адчыненымі варотамі і яркімі вокнамі, адкуль ідзе шмат святла… Мастак мінімальнымі жывапіснымі і кампазіцыйнымі сродкамі праз начную цішыню імкнуўся раскрыць апошнія гадзіны развітання з бацькам, які ўдзельнічаў у вайне і даў жыццё сваім дзецям.
Партрэт “Памяці Веры” прысвечаны жонцы Веры Паўлаўне, доктару мастацтвазнаўства, прафесару, якая 42 гады працавала ў Беларускім дзяржаўным універсітэце культуры і мастацтваў, стварыла сваю навуковую школу, унесла значны ўклад у развіццё беларускай навукі, нацыянальнай культуры і мастацтва.
Твор “Дарога дадому” – гэта філасофскі аповед мастака на фоне роднага дома ў вёсцы Жгунская Буда Добрушскага раёна, пра наша жыццё на зямлі, сваю Бацькаўшчыну, свае карані, пра тое, адкуль мы пайшлі і куды з цягам часу ўсе вернемся.
У экспазіцыі таксама можна ўбачыць кнігі У.І. Пракапцова, прысвечаныя вядомым майстрам Беларусі – Станіславу Жукоўскаму, Вітольду Бялыніцкаму-Бірулі, Фердынанду Рушчыцу і іншым, якія ўвайшлі ў серыю выданняў “Славутыя мастакі з Беларусі”, ініцыятарам якой ён з’яўляецца.
Творы У.І. Пракапцова знаходзяцца ў фондах Нацыянальнага мастацкага музея Рэспублікі Беларусь, Беларускага саюза мастакоў, Нацыянальнага цэнтра сучасных мастацтваў Рэспублікі Беларусь (Мінск), Магілёўскага абласнога мастацкага музея імя П.В. Масленікава, Гомельскага абласнога палацава-паркавага ансамбля Румянцавых-Паскевічаў, Полацкага нацыянальнага гісторыка-культурнага музея-запаведніка, Дома-музея Адама Міцкевіча ў Навагрудку, Добрушскага і Лепельскага раённых краязнаўчых музеяў, у Нацыянальным мастацкім музеі г. Чунціна (КНР), Нацыянальным мастацкім музеі Кітая ў Пекіне, прыватных калекцыях.
У.І. Пракапцоў за асабісты ўклад у развіццё нацыянальнай культуры і мастацтва ўдастоены звання “Ганаровы грамадзянін г. Добруша” і “Ганаровы грамадзянін Лепельскага раёна”.
